Tinulungan ng UNTV News and Rescue Team – Cebu ang call center agent na tumilapon sa sinasakyang motorsiklo matapos banggain ng isa pang naka-motorsiklo (UNTV News)

CEBU CITY, Philippines – Sugat sa tuhod at pananakit ng katawan ang tinamo ng isang call center agent na tumilapon mula sa inaangkasang motorsiklo matapos itong mabangga ng isa pang motorsiklo sa Maguikay St. Mandaue City Cebu mag-aalas dose ng hatinggabi kagabi.

Kinilala ang biktima na si Johanna Baguio.

Agad naming nilapatan ng paunang lunas ng UNTV News and Rescue Team-Cebu ang biktima at saka dinala sa ospital.

Ayon sa driver ng nabanggang motorsiklo, nasagi ang kanyang manibela ng biglang mag-overtake ang sumusunod na motor na naging dahilan ng kanilang pagsemplang.

“Dalawang lalaki yung nakabangga.. Parang sabog yun sila.. walang helmet. Nag-aalala na ako dun sa kaangkas ko, ako kasi incharge dun, kapitbahay ko yun at saka bata pa,” saad ni Perigrino Kalakat, driver ng habal-habal.

Mabilis namang tumakas ang driver ng nakasaging motorsiklo matapos ang aksidente. (Bernard Dadis / Ruth Navales, UNTV News)

Tinulungan ng UNTV News and Rescue Team – Cebu ang sugatang driver ng motorsiklo matapos makabangga ng tumatawid na lalaki sa Mabolo-Cebu city Linggo ng madaling araw (UNTV News)

CEBU, Philippines — Naabutan ng UNTV News and Rescue Team ang driver ng motorsiklo na nakaupo matapos itong makabangga ng isang lalakeng tumatawid sa Linas drive, Brgy. Mabolo, Linggo ng madaling araw.

Naunang isinugod sa ospital ang nabanggang lalake na kinilalang si Jiager Salindez ng Emergency Response Unit Foundation ng Cebu.

Samantalang nagtamo naman ng sugat sa kaliwang tuhod si Sean Christopher Neri, driver ng motorsiklo na nakabangga kay Salindez. Matapos malapatan ng paunang lunas, agad dinala ng UNTV News and Rescue Team si Salindez sa ospital.

“Ato ni siyang hinabion sa pamaagi ug pag conduct of full investigation, after sa investigation kung ang usa ka biktima desidido siya na magpasaka ug kaso ngadto sa nakabangga sa iyaha, atua ni siyang aksyonan (Aalamin natin ang pangyayari sa mamamagitan ng pag conduct ng full investigation at pagkatapos ng imbestigasyon kung ang biktima ay desidido magsampa ng kaso sa nakabangga, atin itong aaksyonan),” pahayag ni Cebu Traffic Officer PO3 Edgar Baton.

Ayon kay Neri, hindi niya napansin ang tumatawid na si Salindez dahil nakasuot ito ng at kulay itim na damit kaya niya ito nabangga. Nangako naman ito na sasagutin ang gastusin sa pagpapagamot ni Salindez sa ospital. (Marlhon Abique, UNTV News)

Nirespondehan ng UNTV News and Rescue Team ang isang isang binata matapos itong masagi ng isang bus habang tumatawid sa Congressional Avenue, QC kagabi (UNTV News)

QUEZON CITY, Philippines — Pasado alas-nuwebe kagabi ng respondehan ng UNTV News and Rescue Team ang isang lalake  matapos masagi ng isang bus habang tumatawid  sa Congressional Avenue, Quezon City.

Nakilala ang biktima na si Karl Daniel Canlas, 19 anyos at residente ng Bago Bantay, Quezon City.

Nagtamo ng pamamaga at sugat sa kilay ang biktima na agad namang binigyan paunang lunas ng UNTV News and Rescue Team at saka dinala sa East Avenue Medical Center.

Ayon naman sa mga nakasaksi, matapos ang insidente agad tumakas ang driver at konduktor ng bus.

Walang plaka ang bus na pag-aari ng Admiral Transport. (UNTV News)

Sa pagsubaybay ng Philippine Coast Guard, sumailalim ang UNTV News and Rescue Team sa limang araw na Safety, Rescue and Survival Techniques Training upang mapag-ibayo ang kasanayan ng grupo sa paglilitas ng buhay sa panahon ng tag-ulan at sa iba’t-ibang anyong tubig. (WEBSTER MOLDEZ / Photoville International)

MANILA, Philippines – Matapos sumailalim sa Basic Water Safety and Rescue Training ng UNTV News and Rescue Team na pinangunahan ni Kuya Daniel Razon sa pakikipagtulungan ng Philippine Red Cross (PRC) noong nakaraang taon, agad nasabak sa aksyon ang grupo sa paglikas sa mga residente sa Roxas District, Roces, Quezon City na na-trap sa kanilang bahay dahil sa mabilis na pagtaas ng baha dulot ng malakas na pag-ulan sanhi ng habagat.

Sa pagnanasa ni Kuya Daniel na madagdagan pa ang kaalaaman sa pagtulong sa kapwa, muling sumailalim sa mas mataas na antas ng pag-aaral sa water rescue ang mga reporter, cameraman, driver, nurse, emergency medical technician at medical first responders ng UNTV News and Rescue Team.

Pinangunahan ng Philippine Coast Guard (PCG) ang limang araw na safety, rescue and survival techniques training na ginanap sa La Mesa Ecopark sa Quezon City at sa Morong Star Beach Resort sa Bataan noong nakaraang linggo.

Kabilang sa mga itinuro ng PCG ang tamang ehersisyo upang mapalakas ang katawan ng mga rescuers, gayundin ang iba’t ibang paraan ng paglangoy, gaya ng freestyle, breast stroke, side stroke, survival back stroke.

Itinuro rin ng coast guard ang mga paraan paano makatatagal sa ilalim ng tubig at mabisang techniques para sa mas matagal at malalayong paglangoy.

Kasama rin sa pinag-aralan ay ang basic rope and rescue techniques, open-water survival techniques, water threading, at river crossing o ang tamang pagtawid sa ilog na may malakas na agos kasama ang ini-re-rescue. (MADZ MILANA / Photoville International)

Bukod sa kaalaman sa paggamit ng rubber boat, ibinahagi rin ng PCG ang tamang paraan ng pagayos, sakaling tumaob ang sinasakyang rubber boat.

Sa huling araw, tinapos ng mga participants ang limang araw ng training sa pamamagitan ng one-mile swim o paglangoy sa dagat sa distansya na isang milya.

“Inenhance natin yung lakas natin sa pagse-save sa tubig at saka survival skills. Yung 5 days na training na yun covered a lot of things but one thing is definitely sure when the rainy season comes the TMBB team will be ready for whatever disaster na dumating sa atin ngayon,” pahayag ni Jeffrey Santos, Operations Manager ng UNTV Rescue.

“Ang adbokasiya ni Kuya Daniel sa kanila na ang scoop basta tayo may isasalba tayong buhay that’s what our aiming The Glory To GOD,” dagdag pa nito

“Dun sa adbokasiya ni Kuya Daniel na Tulong Muna Bago Balita, kumbaga general term yung TMBB so any emergency dapat matuto yung mga kasama matuto kami as reporter, yun kasi ang pinaka-purpose ni Kuya Daniel na adbokasiya na news team sa atin na matuto ng ibat-ibang klase ng rescue,” saad naman ni Benedict Galazan, Host ng QUAT Program at Senior Correspondent ng UNTV News.

“Tumutok kami sa lahat ng bagay na 5 days na yan mula sa kanilang mental capability, physical capability saka emotional capability so pinagsama-sama namin yun binigyan namin sila ng senaryo saka training na ngayon lang nila naranasan,” saad naman ni PO2 Arnel D. Alejandro, PCG Trainor.

Ayon sa Philippine Coast Guard, mahalaga na patuloy ang isinasagawang pag-aaral sa kaalaman sa pagsagip sa buhay, hindi lamang sa mga rescuer kundi sa lahat dahil pagdating ng sakuna, mas mabuti ang palaging nakahanda. (Bernard Dadis / Ruth Navales, UNTV News)

Nirespondehan ng Laguna UNTV News and Rescue team ang isang vehicular accident sa Biñan, Laguna noong Martes (UNTV News)

LAGUNA, Philippines — Tinulungan ng UNTV Laguna News and Rescue Team ang driver at pahinante ng isang cargo truck na bumangga sa concrete barrier sa south bound lane ng South Luzon Expressway (SLEX) sa Biñan, Laguna.

Katuwang ang Life Line Rescue Unit ng SLEX, mabilis na naialis ang driver na si Cabandon Niconsidonio mula sa pagkakaipit sa loob ng truck.

Ang pahinante naman nito na si Antonio Mahinay, tumalsik sa damuhan dahil sa lakas ng pagkakabangga.

Kapuwa nagtamo ng minor injury sa ulo at gasgas sa paa ang dalawang biktima.

Kwento pa ni Mahinay, iniwasan nila ang sinusundan nilang sasakyan na babangga sa kanila kung kaya’t nawalan ng kontrol sa manibela ang kaniyang driver.

Napansin naman ng patroller ng SLEX na pudpud na ang gulong ng cargo truck na maaring dahilan kung bakit hindi kaagad kumagat ang preno nito.

“Di naman mabilis takbo malamang inaantok, magingat sa pagmamaneho at laging aware sa anumang mangyari. Dapat laging handa bukas ang mata at isip,” paalala ni SLEX Patroller Ruel Dela Cruz. (Sherwin Culubong / Ruth Navales, UNTV News)

Tinulungan ng UNTV News and Rescue Team – Cebu ang sugatang driver ng motorsiklo matapos banggain ng isang Crosswind ang sinasakyang motorsiklo kahapon ng madaling araw, Huwebes (UNTV News)

CEBU CITY, Philippines — Isang Crosswind ang bumangga sa isang motorsiklo matapos itong mag-U-turn sa Gen. Maxilom St. Mango Avenue, Cebu City, pasado alas dose kahapon ng madaling araw, Huwebes.

Nagtamo ng gasgas sa kanang paa at kamay ang driver ng motorsiklo na kinilalang si Winston Davis, nakatira sa Urgello St. sa nasabing lungsod.

Agad na nilapatan ng paunang lunas ng news and rescue team ang biktima, subalit tumanggi na itong magpadala pa sa ospital.

“Medyo naka-contribute sad ni ug kusog, kusog man sad ug dagan ang motor.”

Translation: “parang naka-contribute din ito sa lakas, mabilis din ang takbo ng motor,” pahayag ni PO2 Chady Jungoy.

Matapos mag-usap, nagkasundo na lang ang dalawang motorista kaugnay sa nangyaring aksidente. (Marlhon Abique / Ruth Navales, UNTV News)

Ang paglapat ng first aid ng UNTV News and Rescue Team sa isang nasaksak na seaman na nagngangalang Jairo Rodriguez bago ito isugod sa East Avenue Medical Center nitong Linggo ng gabi. (UNTV News)

MANILA, Philippines – Nirespondehan ng UNTV News and Rescue Team ang isang lalaking nasaksak matapos umanong manlaban sa isang holdaper sa Commonwealth Avenue, Brgy. UP Quezon City, Linggo ng gabi.

Duguan at halos hindi makagalaw ang biktima nang madatnan ng news and rescue team dahil sa tinamo nitong saksak sa tagiliran, leeg at braso na mabilis namang nilapatan ng paunang lunas ng grupo.

Matapos nito ay agad dinala ang biktima sa East Avenue Medical Center.

Bagama’t nanghihina dahil sa tinamong sugat, naikwento pa ng biktimang si Jairo Rodriguez, 25-anyos ang pangyayari.

Aniya, pauwi na sana siya sakay ng bus nang may lalaking humingi sa kanya ng tulong kung paano makakauwi sa Montalban, Rizal.

Nahikaya’t umano siya nitong bumaba ng bus pagdating sa eastbound lane ng Commonwealth Avenue sa bahagi na ng Barangay UP.

Naglakad umano sila hanggang sa makarating sa madilim na lugar at doon na siya hinoldap ng suspek.

Sinubukan pa umano niyang manlaban subalit inundayan na siya nito ng saksak, saka tinangay ang kanyang wallet na may lamang limang libong piso, passport at seaman’s book.

Agad namang tumakas ang suspek at iniwan ang duguang biktima.

Mabuti na lamang at nakita siya ng isang tauhan ng MMDA na agad nakahingi ng tulong.

“Kinausap ko yung biktima sabi nya sa akin sinabi ko sa kanya napano ka sabi niya modus-modus,” pahayag n Jose Encinas, Traffic Constable 3 ng MMDA.

Sa ngayon ay iniimbestigahan na ng mga awtoridad ang kaso at ang posibleng pagkakakilanlan ng suspek. (Jerico Albano / Ruth Navales, UNTV News)

Tinulungan ng UNTV News and Rescue Team ang isang lalaking binugbog sa Laguna (UNTV News)

LAGUNA, Philippines – Nilapatan ng pang unang lunas ng UNTV Laguna News and Rescue Team ang sugatang lalaki na kinilalang si Ken Carpena, 25 anyos, residente sa Barangay Malaban, Biñan Laguna.

Nagtamo si Carpena ng gasgas sa kanang likod at kaliwang kamay matapos umanong bugbugin ng isang alyas Owa, pasado alas-9 kagabi sa Southville 4 Barangay Caingin, sa Sta. Rosa, Laguna.

Duguan ang ilong ng biktima at idinadaing ang pananakit ng batok at ulo dahil sa tinamong bugbog.

Ayon kay Carpena, pumunta siya sa lugar upang makipagkita sa mga kasama niya sa clan.

Sinabi naman ng barangay officials sa Barangay Kaingen na madalas na nangyayari sa kanilang lugar ang insidente ng pananakit lalo na sa mga kabataan.

“Marami yan eh, maraming nangyayaring ganyan sa loob,” pahayag ni Dennis Besmonte, imbestigador.

Tumanggi namang magpadala sa ospital ang biktima matapos malapatan ng pang unang lunas. (Jerico Albano / Ruth Navales, UNTV News)

Sumabak ang UNTV News and Rescue Team Iloilo sa limang araw na water rescue training upang makadagdag pa ng serbisyo publiko sa mga Ilonggo sa panahon ng tagulan at mga sakuna sa tubig (UNTV News)

ILOILO, Philippines — Upang mas mapalakas pa ang mga public service advocacy na isinasagawa ng UNTV sa pangunguna ni Kuya Daniel Razon, lalo na ng pagsagip ng buhay ng ating kapwa tao, sumailalim sa limang araw na water rescue ang UNTV News Team sa Iloilo.

Sa unang araw ng training ay sinubukan ng mga instructor mula sa Philippine National Red Cross Iloilo chapter ang kaalaman ng grupo sa paglangoy at basic rescue.

Sa ikalawang araw naman, tinuruan ang grupo sa iba’t ibang paraan ng paglutang sa tubig at maging ang iba’t-ibang stroke sa paglangoy katulad ng freestyle, breast stroke, backstroke, side stroke at elementary back.

Tinuro rin ang iba’t ibang modified strokes ng mga nabanggit na swimming techniques kung saan nakalitaw ang ulo ng swimmer sa tubig na ginagamit sa water rescue operations upang mapanatiling nasa line of sight ng rescuer ang biktima.

“Yung natutunan ko ro’n, yung tamang paraan ng paglangoy na hindi ka mabilis mapagod. Kapag nasa tubig na nakakapagod din, pero ‘pag alam mo ang tamang paraan paglangoy hindi ka basta-basta napapagod,” ani Mario Damian Jr. na isang water rescue participant.

Sinanay din sa iba’t-ibang dive at jump techniques ang grupo sa ikatlong araw ng pagsasanay katulad ng standing at sitting dive, rescue jump, stride jump at slide in entry.

Dito rin itinuro ang kahalagahan ng komunikasyon sa pagitan ng rescuer at ng sasagiping biktima.

Binigyang diin ng mga instructor ang tamang paraan ng pagsagip sa isang nagpapanic na biktima upang hindi malagay sa panganib kapwa ang buhay nila ng rescuer.

“Yung skills natin na binigay, dapat gagawin natin kasanayan na. Kapag nasanay ka na doon the rest of the skills will follow nalang at the same time yung buoyancy. Yung control sa buoyancy mo is very important, plus daily kahit once a week na lang magkaroon tayo ng skill enhancement para tuluy-tuloy yung skills natin mas maganda yun ang importante doon,” saad ni Jun Deslate, Red Cross volunteer instructor.

Subali’t sakali mang hindi posible ang naturang proseso, tinuruan din ang mga rescuer ng tamang approach sa biktima kahit na nagpapanic o di naman kaya ay nawalan na ng malay.

Sa ikaapat na araw ng training ay sinanay naman ang grupo sa wastong paggamit ng mga water safety equipments katulad ng rescue can o rescue buoy, rescue tube, throw bag at maging ang wastong pagsuot ng life jacket.

Isang practical exam naman ang isinagawa nang ikalimang araw upang masubukan ang kaalamang nakuha ng mga rescuer at matiyak na pupwede na ang mga ito na sumabak sa water rescue operations.

Labing limang participants sa UNTV News and Rescue Team Iloilo ang lumahok at sumabak sa naturang water rescue training.

“So we’re thankful that UNTV has taken time of course the logistic and the efforts to train their people, and inviting them once again for the next series of trainings for probably in the future. Thank you to you UNTV, continue to persist the advocacy in helping people in need,” pahayag ni Philippine Red Cross Gilbert Paul Valderama.

Sa pamamagitan ng naturang water rescue training katuwang ang Philippine Red Cross, mas lalo pang mapapalawak ang serbisyo publikong hatid ng UNTV sa Iloilo, maging sa panahon ng kalamidad katulad ng pagbaha at bagyo gayun din ng mga insidente sa dagat at ilog. (Reynante Ponte, UNTV News)

Isa sa tatlong sugatan sa motorcycle accident na nirespondehan ng UNTV News and Rescue Team Laguna. (UNTV News)

LAGUNA, Philippines – Tinulungan ng UNTV-Laguna News and Rescue Team ang isang beterinaryo at dalawa pang kasamahan nito matapos maaksidente sa motorsiklo sa Barangay Sala, Cabuyao, Laguna, pasado alas-11 kagabi.

Nagtamo si Dr. Noel at dalawa pang kasama nito ng mga gasgas sa iba’t ibang bahagi ng katawan na agad namang nilapatan ng pangunang lunas ng UNTV News and Rescue Team.

Ayon kay Edwin Factoriza na nakasaksi sa pangyayari, hindi napansin ng mga biktima ang mga butas sa kalsada at ang warning sign na walang ilaw.

“Malalim yung lubak na yun malamang dun sila nadali kasi batay sa salaysay nung dalawa magkasunod lamang sila kasi wala man lang
nakalagay na signal eh umislide ho.”

Ayon naman sa Cabuyao Police, inilapit na nila sa barangay sala ang problema subalit wala pa ring ginagawang aksyon.

Tumanggi namang magpadala pa sa ospital ang mga biktima matapos na malapatan ng first aid. (Sherwin Culubong / Ruth Navales, UNTV News)

Tinulungan ng UNTV-Iloilo News and Rescue Team ang isang barangay kagawad na sinaksak sa isang kalye sa Brgy. Baldoza, Lapaz, Iloilo ng di pa nakikilalang mga suspek, madaling araw ng Miyerkules (UNTV News)

ILOILO CITY, Philippines – Tinulungan ng UNTV-Iloilo News and Rescue Team ang isang barangay kagawad na sinaksak ng di pa nakikilalang mga suspek sa isang kalye sa Brgy. Baldoza, Lapaz, Iloilo, ala-1 ng madaling araw kahapon, Miyerkules.

Kinilala ang biktima na si Kagawad Erwin Pagayon, 38 anyos, na nagtamo ng sugat sa kaliwang kamay matapos saksakin ng ilang kalalakihan sa nasabing lugar.

Ayon sa biktima, may binibili siya sa tindahan nang dumaan ang mga lalaki at nanggulo.

“Ti ako tani birahon ya, ti gin tapna ko dali lang gid,dali lang gid, anu problem migo, ti anu haw..isog pa bala haw,ti indi ah ti  wala kami di ya problema, bag-o lang sila kaabut ya, ti gahulat na lang sang amun ginbakal, ti sarusuhon ya tani ang boarders ko, ti sinalo ko dali lang gid.”

Translation: “Ako sana titirahin niya, kasi pinansin ko siya, sandal lang…anu problema mu kaibigan, tapus sabi niya,” Bakit ba, matapang pa ang dating, wala kaming problema dito, karating lang nila, habang naghihintay kami sa binili naming,tapus susulungin pa sana yung boarders namin, bigla kong tinambagan,sandal lang.”

Agad din namang rumesponde din ang mga pulis ng Lapaz Police Station at hinabol ang mga suspek ngunit nakatakas ang mga ito.

Dinala naman ang biktima sa Lapaz Police Station upang makapagbigay ng salaysay at maipa-blotter ang mga suspek. (Sherwin Culubong / Ruth Navales, UNTV News)

Ang paglo-load ng naaksidenteng si Darwin Guerrero sa UNTV News and Rescue van upang maihatid sa pinakamalapit na ospital matapos malapatan ng pang-unang lunas ng grupo. (UNTV News)

QUEZON CITY, Philippines – Tinulungan ng UNTV News and Rescue Team ang isang sugatang lalaki sa may bahagi ng Quezon Avenue sa lungsod Quezon, pasado alas-11 nitong gabi ng Linggo.

Agad na inilagay sa spine board at isinakay sa rescue van ang biktima na kinilalang si Darwin Guererro na nagtamo ng malaking sugat sa likurang bahagi ng ulo.

Nilapatan ng paunang lunas ng News and Rescue Team ang tinamong pinsala ni Guererro at dinala sa Capitol Medical Center upang masuri ng doktor ang kanyang kalagayan.

Sa inisyal na impormasyon, nabangga ng van ang biktima habang tumatawid sa Quezon Avenue.

Nakahanda namang panagutan ng driver ng van ang magiging gastusin sa ospital ng biktima.

Napag-alaman na ilang metro lamang ang layo ng footbridge sa pinangyarihan ng aksidente, subalit tumawid pa rin ang biktima sa lugar kung saan mahigpit na ipinagbabawal ang pagtawid.

Hawak na ng Quezon City Traffic Sector ang kaso upang malaman kung ano ang posibleng pananagutan ng nakabanggang driver. (Benedict Galazan / Ruth Navales, UNTV News)

Ang mag-amang biktima ng motorcycle accident sa Cebu habang nilalapatan ng first aid ng UNTV News and Rescue Team. (UNTV News)

CEBU CITY, Philippines – Tinulungan ng UNTV News and Rescue Team ang dalawang biktima ng motorcycle accident sa Cebu.

Bumangga sa likurang bahagi ng isang truck ang sinasakyang motor ng mag-amang sina Robin Tapia at Roland Tapia sa Brgy. Tipolo, Mandaue City, ala-una ng madaling araw nitong Martes.

Nagtamo ng mga gasgas sa kanang braso at kanang hita si Robin Tapia, samantalang galos naman sa kanang braso ang tinamo ni Roland.

Nilapatan ng paunang lunas ng UNTV News and Rescue Team ang mga biktima at dinala sa St. Vincent Hospital sa Cebu.

Ayon sa mga nakasaksi, binabagtas ng dalawang sasakyan ang kahabaan ng main road nang napadaan sa lubak ang sinasakyang motor ng mag-ama kaya tumama sa likuran ng truck. (UNTV News)

Ang paglalapat ng first aid ng UNTV News and Rescue Team Laguna sa isa sa mga biktima ng motorcycle accident nitong Miyerkules ng gabi. (UNTV News)

LAGUNA, Philippines – Nilapatan ng pang-unang lunas ng UNTV News and Rescue Team ang dalawang sugatang driver ng motorsiklo na nagkabanggaan sa Old National Highway, Barangay San Antonio, sa Biñan Laguna, pasado alas-11 ng gabi ng Miyerkules.

Kinilala ang dalawang driver na sina Mark Fro na nagtamo ng sugat sa kaliwang kamay, habang nagtamo naman ng sugat sa kaliwang tuhod si Nasan Villanueva.

Ayon sa Biñan Police, naiwasan sana ang aksidente kung nagbigyan lamang sila ang dalawang driver ng motorsiklo.

“Ano lang to konting hindi lang nagbigayan ang mga ito. Di naman traffic. Kung titingnan niyo traffic, napakaluwag naman. Pag ikaw nasa intersection dapat suppose to be bago ka pumasok left and right dapat tingnan mo kung may sasakyan o wala para pagpasok mo clear,” pahayag ng imbestigador na si PO1 Noriel Manaig.

Samantala rumesponde din ang UNTV News and Rescue Team kasama ang Sta. Rosa Rescue sa trycycle driver na hinihinalang biktima ng hit and run sa national highway Barangay Tagapo, Sta. Rosa, Laguna, alas-2 ng madaling araw ng Huwebes.

Nagtamo ng sugat sa ulo, tuhod at paa ang biktima na agad namang nilapatan ng pang-unang lunas ng rescue team at dinala sa community hospital ng Sta. Rosa, Rescue.

Tumulong naman ang UNTV News and Rescue Team sa pag-aayos ng daloy ng mga sasakyan dahil madilim ang lugar at maraming mga malalaking sasakyan ang dumadaan. (Sherwin Culubong / Ruth Navales, UNTV News)

Ang paglalapat ng pang-unang lunas o first aid sa isang biktima ng motorcycle accident sa Iloilo nitong Martes ng madaling araw. (UNTV News)

ILOILO CITY, Philippines – Nirespondehan ng UNTV News and Rescue Team ang isang motorcycle accident sa Iloilo City nitong madaling araw ng Martes.

Nagtamo ng mga sugat sa mukha at sa iba’t ibang panig katawan ang biktimang si Rogelio Adio Jr., 27 anyos, nakatira sa Brgy. 15 sa bayan ng San Miguel sa nasabing lungsod matapos mabangga ang isa pang motorsiklo na nasa kanyang umahan.

Ayon sa driver ng nabanggang motorsiklo na si Rossini Sillonar, nauna siya sa biktima sakay ng kanyang motorsiklo at nagulat siya ng biglang bumangga sa kanyang likuran ang motorsiklo ni Adio.

Agad namang nilapatan ng pangunang lunas ng UNTV News and Rescue Team ang biktima at mabilis na isinugod sa emergency room ng Western Visayas Hospital. (Reynante Ponte / Ruth Navales, UNTV News)

Tinulungan ng UNTV News and Rescue Team – Laguna, kasama ang Biñan Emergency Rescue Unit ang isang sugatang biktima ng motorcycle accident nung Linggo (UNTV News)

MANILA, Philippines – Sugatan si Oscar Morales matapos mabangga ng isa ring motorsklo ang likurang bahagi ng kanyang motorsiklo sa Barangay Canlalay Biñan, Laguna pasado alas-sais ng umaga nung Linggo.

Nagtamo ang biktima ng sugat sa labi at kanang tuhod dahil sa pagkakasubsob sa semento.

Agad namang tinulungan ng UNTV News and Rescue Team ang biktima kasama ang Biñan Emergency Rescue Unit at dinala sa pagamutan.

Kwento ng mga saksi sa lugar, palabas ng Golden Gate subdivision si Morales nang mangyari ang aksidente. (UNTV News)

Dalawang babaeng nasugatan sa isinagawang demolisyon sa mga bahay sa gilid ng Mahiga creek sa Sitio Mahayag, Barangay Subangdaku, Mandaue City ang tinulungan ng UNTV News and Rescue Team (UNTV News)

MANDAUE CITY, Philippines – Tinulungan ng UNTV News and Rescue Team ang dalawang babaeng nasugatan sa isinagawang demolisyon sa mga bahay sa gilid ng Mahiga creek sa Sitio Mahayag, Barangay Subangdaku, Mandaue City kahapon ng umaga, Martes.

Kinilala ang mga biktima na sina Elma Remedio at Elphi Cabaltera, pawang mga residente ng Sitio Mahayag na nagtamo ng sugat sa ulo matapos tamaan ng bato.

Agad namang nilapatan ng paunang lunas ng UNTV News and Rescue Team ang dalawang nasugatan at inilayo sa kaguluhan.

Samantala, sa kabila ng pagpupumilit ng mga residente ay natuloy rin ang pag-giba ng Mandaue City Legal Office sa mahigit isandaang bahay sa gilid ng nasabing creek, alas-2 ng hapon kahapon.

Kinondena naman ng pulisya ang paggamit ng mga residente sa mga bata bilang pananggalang sa demolition team. (Naomi Sorianosos / Ruth Navales, UNTV News)

MANILA, Philippines – Tinulungan ng UNTV News and Rescue Team ang mga biktima ng banggaan ng tricycle at truck sa Barangay Sto. Rosario, Sta. Rosa, Nueva Ecija, pasado alas-11 kagabi, Martes.

Dahil sa lakas ng impact ng banggan, nagkayupi-yupi ang tricycle na sinasakyan ng tatlong magpipinsan na kinilalang sina Edwin Domingo, 18 anyos; Aries Ripa, 15 anyos; at Rodel Sto. Domingo, 21 anyos, kapwa residente ng Barangay Sto. Rosario.

Dead on the spot naman ang dalawang pinsan ni Edwin na sina Aries at Rodel.

Agad namang tinulungan at nilapan ng first aide ng UNTV News and Rescue Team si Edwin Domingo.

Ayon sa mag-asawang Rosie at Sergio Francisco na nakakita sa pangyayari, paliko-liko umano ang takbo ng tricycle nang makasalubong nito ang truck.

“Nasusundan naming paliko-liko, sabi ng mister ko mababangga yan eh huwag mong itutok itong motor natin eka ko, napakatulin ng tabko nila eh paekis-ekis yan,” saad ni Rosie.

“Sa tanaw ko yung truck umiiwas eh sila ang kumuwan sa truck eh sa pagkakita ko eh hanggang dun lang,” pahayag naman ni Sergio Francisco.

Ayon sa driver ng truck na si Dario Labaora, pinilit niyang iwasan ang tricycle ngunit bumangga pa rin ito sa harapan ng minamanehong truck.

“Mabagal lang po yung takbo ko, katamtaman lang po yung truck eh kahit anong iwas ang gawin ko eh sila ang sumalubong sa amin kaya wala na po ako nagawa.”

Samantala, kasalukuyan namang nagpapagaling si Edwin Domingo sa Dr. Paulino J. Garcia Memorial Research sa Cabanatuan City. (Grace Doctolero / Ruth Navales, UNTV News)

QUEZON CITY, Philippines – Nirespondehan ng UNTV News and Rescue Team ang nangyaring banggaan ng motorsiklo at bisikleta sa Roosevelt Avenue, corner Quezon Avenue, alas-11 kagabi, Miyerkules.

Agad nilapatan ng grupo ng paunang lunas ang driver ng bisikleta na kinilalang si Gilbert Villazar, 30 anyos, na nagtamo ng pinsala sa katawan.

Ginamot naman ng Department of Public Order and Safety (DPOS) Rescue ang sugatan ring motorcycle rider na si Mark Jude Menter, 23 anyos.

Kapwa dinala ng rescue teams sa Capitol Medical Center ang dalawang biktima.

Base sa inisyal na impormasyon, nabangga ng motorsiklo ang bisikleta habang binabaybay ang kahabaan ng Quezon Avenue.

Iniimbestigahan na ng mga awtoridad kung sino ang dapat na managot sa nangyaring aksidente. (Benedict Galazan / Ruth Navales, UNTV News)

Tinulungan ng UNTV News and Rescue Team ang mga biktima ng isang motorcycle accident sa Cebu City, kaninang madaling araw (UNTV News)

CEBU CITY, Philippines — Nakahandusay  sa daan at duguan ang isang lalake nang madatnan ng UNTV News and Rescue Team sa Casuntingan, Mandaue City pasado alas-dose ng madaling araw kanina.

Kinilala ang biktima na si Joseph Monez, 42 taong gulang at residente ng Mandaue City.

Ayon sa angkas ng motorsiklo, nawalan ng control ang driver kaya bigla silang sumemplang.

Nagtamo ng sugat sa bibig at ilong si Monez habang gasgas lamang sa tuhod ang tinamo ng backrider.

Agad namang nilapatan ng pangunang lunas ng UNTV News and Rescue Team ang mga biktima bago dinala sa Mandaue District Hospital. (Marlhon Abique, UNTV News)