Ang pagresponde ng UNTV News and Rescue Team Pampanga katuwang ang Bureau of Fire Protection sa isang aksidente sa pagitan ng isang motorsiklo at SUV sa San Fernando City nitong Biyernes. (UNTV News)

SAN FERNANDO CITY, Philippines — Duguan at nakahandusay pa sa kalsada nang abutan ng UNTV News and Rescue Team ang isang lalaki matapos sumalpok ang minamaneho nitong motorsiklo  sa isang SUV sa kahabaan ng Brgy. Del Pilar, San Fernando City, Pampanga, pasado ala-una ng hapon, Biyernes.

Mabilis na tinulungan ng UNTV News and Rescue Team ang biktima na kinilalang si Zosimo Mercado, residente ng Mabalacat, Pampanga na nagtamo ng sugat sa iba’t-ibang parte ng katawan.

Ayon sa driver ng SUV na si Apolinario Florentino, paliko na siya nang biglang sumalpok ang motorsiklo

Dagdag pa ni Florentino, mabilis umano ang takbo ng motorsiklo at hindi na nagawang magpreno kaya bumangga ito sa kaniyang sasakyan.

Matapos mabigyan ng pangunang lunas ng UNTV News and Rescue Team at Bureau of Fire Protection Emergency Team ay agad isinugod ang biktima sa Pampanga Provincial Hospital. (Bernard Dadis & Ruth Navales, UNTV News)

Ang isa sa 3 motorcycle accident sa QC kamakailan na nirespondehan ng UNTV News and Rescue Team. Katuwang sa aksidenteng ito sa Congressional Avenue ang Quezon City DPOS Rescue. (UNTV News)

QUEZON CITY, Philippines — Sugatan ang tatlong sakay ng isang motorsiklo matapos bumangga sa puno at poste ng ilaw sa Congressional Avenue, Quezon City, Lunes ng madaling araw.

Patungo sana ng Mindanao Avenue ang mga biktima galing EDSA nang mawalan ng kontrol ang driver ng motorsiklo na kinilalang si Stephen Joshua Tan.

Namamaga ang kanang tuhod at temporal area ni Tan dahil sa aksidente.

Nagtamo naman ng sugat sa iba’t ibang bahagi ng katawan ang dalawang angkas ng motorsiklo na kinilalang sina Richard Edward Rivera.

Agad namang binigyan ng pangunang lunas ng UNTV News and Rescue Team ang mga biktima at isiniguod sa Quezon City General Hospital.

***

Isa pang aksidente sa motorsiklo ang nirespondehan ng UNTV News and Rescue Team sa may bahagi ng Balintawak, Quezon City, Linggo ng gabi.

Nagtamo ng gasgas sa iba’t ibang bahagi ng katawan ang biktima na nakilalang si Alenandro Abesamis.

At dahil walang suot na helmet, nagtamo rin ito ng malaking bukol sa batok at pamamaga sa kaliwang kilay.

Matapos mabigyan ng first aid ay agad itong inihatid ng rescue team sa East Avenue Medical Center.

***

Samantala, isang motorsiklo naman ang bumanga sa isang taxi habang papaliko sa Congressional Avenue Quezon City, pasado ala-5 ng hapon noong Sabado.

Sa lakas ng pagkakabangga, natangal ang ngipin ng biktima na si Jefferson Makabalog.

Nagtamo rin ito ng putok sa ulo at mga labi.

Ayon sa taxi driver na si Jeffrey Rehas, posibleng nakainom ng alak ang si Makabalog.

Matapos mabigyan ng first aid ay agad dinala ang biktima sa West Avenue Medical Center. (Bianca Mari Dava / Ruth Navales, UNTV News)

Ang nasugatang si George Manaloto na taga-San Simon, Pampanga habang ginagamot ng UNTV News and Rescue Team. (UNTV News)

PAMPANGA, Philippines — Mabilis na nirespondehan ng UNTV News and Rescue Team ang salpukan ng motorsiklo at tricycle sa kahabaan ng Brgy. Sampaloc, Apalit, Pampanga pasado ala-1 ng hapon, Lunes.

Agad nilapatan ng paunang lunas ng grupo ang mga sugatang biktima na sina Tess Quiambao, 48 anyos na taga San Matias, San Fernando City at George Manaloto, 48 anyos residente ng San Simon, Pampanga.

Ayon sa mga nakasaksi, nagkagitgitan umano ang dalawang sasakyan hanggang sa tuluyang nawalan ng kontrol ang driver ng tricycle kaya’t bumangga ito sa motorsiklo.

Mabilis umano ang takbo ng tricycle at hindi na nagawang mag-preno.

Nagtamo ng mga sugat sa kamay, tuhod at sa braso si Manaloto, habang iniinda naman ni Quiambao ang pananakit ng kaniyang hita at ulo.

Nagpasalamat naman si Manaloto sa mabilis na responde ng grupo.

“Maganda yung serbisyo niyo, kahit pala konting damages lang nandito pa kayo parati active.”

Matapos mabigyan ng pangunang lunas ng UNTV News and Rescue Team ang mga biktima ay kapwa tumanggi ang mga ito na magpadala sa ospital. (Rey Tamayo / Ruth Navales, UNTV News)

Ang naaksidenteng motorista na kinilalang si Arthuro Gabriel habang nilalapatan ng first aid ng UNTV News and Rescue Team. (UNTV News)

MANILA, Philippines – Sugatan ang isang motorcycle rider matapos itong bumangga sa steel barrier sa Congressional Road corner Tandang Sora, Quezon City, alas-12:30 ng madaling araw ngayong Lunes.

Nagtamo ng malalim na sugat sa baba at sa kanang bahagi ng noo ang driver ng motorsiklo na si Arthuro Gabriel na agad namang nilapatan ng pang-unang lunas ng UNTV News and Rescue Team.

Matapos lapatan ng first aid ay agad dinala ng rescue team ang biktima sa East Avenue Medical Center (AVMC) at ipinaalam ang kalagayan nito sa kaniyang pamilya.

Ayon sa mga nakasaksi sa aksidente, mabilis ang takbo ng motorsiklo, at dahil sa lakas ng impact, nawasak nang husto ang motorsiklo.

“Biglang tumunog itong barandilyas. Nakita ko yung motor at yung tao nakataob na, ang bilis kasi ng takbo,” pahayag ni Oscar Escanio, BPSO.(Benedict Galazan / Ruth Navales, UNTV News)

Isang sugating raliyista ang binibigyan ng atensyong medikal ng miyembro ng UNTV News and Rescue Team habang isinasagawa ang demonstrasyon sa Commonwealth Avenue kasabay ng SONA ni Pangulong Benigno Aquino III sa Batasang Pambasa nitong Lunes, Hulyo 22, 2013. (PHOTOVILLE International)

QUEZON CITY, Philippines — Mabilis na nilapatan ng paunang lunas ng UNTV News and Rescue Team kasama ang iba pang rescue unit ang mga nasugatang pulis at raliyista matapos magpang-abot ang dalawang panig sa Commonwealth Avenue ilang oras bago ang State of the Nation Address (SONA) ni Pangulong Benigno Aquino III.

Magkakatuwang na nilapatan ng pangunang lunas ng Quezon City Police District-Health Service, Bureau of Fire Protection/EMS-NCR, Philippine Red Cross (PRC) at UNTV News and Rescue Team ang mga nasugatang pulis at raliyista.

Lima (5) sa mga pulis ang nilapatan ng first aid ng News and Rescue Team, kabilang dito si PO1 Renel Tamayo, PO1 Mark Anthony De Jesus, PO1 Jerome Realin, PO1 James Locsin, at si PO1 Warren Bong Panton na malubhang nasugatan.

Pito (7) naman sa mga sugatang raliyista ang nabigyan ng paunang lunas ng mga rumespondeng rescuer kabilang pa rin ang UNTV.

Sa pinakahuling tala ng PNP Advance Command Post, mahigit 20 pulis ang nasaktan at nasugatan, habang mahigit 40 sa mga raliyista.

Lahat ng mga ito ay inaresto ng Quezon City Police District (QCPD). (Benedict Galazan / Ruth Navales, UNTV News)

Ang sunog na ito na tumupok ilang kabahayan sa Gagalangin, Tondo ang magkakasamang pinagtulung-tulungang apulahin ng iba’t ibang fire brigade nitong Huwebes ng madaling araw, August 01, 2013. Nandoon din ang UNTV Fire Brigade upang tumuwang sa pagpatay ng apoy. (UNTV News)

MANILA, Philippines — Mabilis na tinupok ng apoy ang isang residential compound sa road 1 corner Peralta Street, Gagalangin sa Tondo, Maynila pasado ala-1 ng madaling araw, Huwebes.

Ayon sa anak ng may-ari ng compound na si Pablo Elguera, nagsimula ang sunog sa inuupahang apartment ng isang nagngangalang “Bong”.

“May nakita daw nagaaway naghahabulan daw dyan tapos sinilaban ang bahay, sinasabi ko sa inyo walang sunog na nagsimula ng malaki laging sa maliit at maraming tao rito na papatay dun”

Nahirapan naman ang mga awtoridad na apulain ang apoy dahil bukod sa masikip na daan patungo sa compound, inagaw pa ng ilang residente ang hose ng tubig ng mga bumbero.

Ayon kay Fire Chief Insp. Bonifacio Carta ng Manila Fire District, limang bahay ang nasunog sa loob ng compound at tinatayang aabot sa 1.5-milyong piso ang halaga ng napinsalang ari-arian na umabot sa ikalimang alarma.

Katulong ang UNTV Fire Brigade na umapula sa sunog na tumagal ng isang oras. (Benedict Galazan / Ruth Navales, UNTV News)

(Upper Left) Ang driver ng motorsiklo na bumangga sa sa truck habang nilalapatan ng pangunang lunas ng UNTV News and Rescue Team-Cebu nitong Lunes, August 26, 2013 sa isang intersection sa lugar ng Pier 4 ng Cebu City. (UNTV News)

CEBU CITY, Philippines – Tinulungan ng UNTV News and Rescue Team ang isang lalaki na naaksidente kaninang tanghali sa intersection sa may bahagi ng Pier 4 sa Cebu City.

Nagtamo ng galos sa mukha at sugat sa binti ang driver ng motorsiklo na kinilalang si Norwin Velasco na taga Lawaan Cebu City matapos bumangga ang sinasakyan nitong motorsiklo sa isang trailer truck na biglang huminto.

Ayon naman sa pahayag ng truck driver, hindi na niya namalayan na may kasunod siyang motorsiklo.

Matapos mabigyan ng first aid ng news and rescue team si Velasco ay tumanggi na itong magpadala sa ospital. (Naomi Sorianosos / Ruth Navales, UNTV News)

Magkatuwang ng nilapatan ng UNTV News and Rescue Team at Lifeline Rescue ng first aid ang naaksidenteng ito sa Novaliches, Quezon City noong Agosto 25, 2013. (UNTV News)

QUEZON CITY, Philippines – Nirespondehan ng UNTV News and Rescue Team ang isang aksidente na kinasangkutan ng isang motorcycle rider at isang babaeng nabundol nito sa kahabaan ng Quirino Highway sa  Novaliches, Quezon City, Linggo.

Habang dinala ng isang rescue team ang sugatang babae, tinulungan naman ng UNTV News and Rescue Team ang sugatan ring driver ng motorsiklo.

Agad nilapatan ng grupo ng pangunang lunas ang driver at sinakay sa rescue van saka dinala sa pinakamalapit na pagamutan.

Ayon sa mga nakakita sa aksidente, patawid ang babae nang mahagip ito at makaladkad ng motorsiklo na may plate number 5085TC

“Nag-counter flow yung itong motor dito sa Quirino Highway tapos yong babae patawid nasalpok siya at nakaladkad,” ani Anastacio Farina Jr, nakakita sa aksidente.

“Basta nakita po namin tumalsik po sila pareho pagkabangga sa babae,” pahayag naman ng isa pang saksi na si Marissa Siasico.

Patuloy namang nagpapaala ang mga awtoridad sa mga motorista na palaging sumunod sa batas trapiko para makaiwas sa peligro. (Victor Cosare / Ruth Navales, UNTV News)

Ang paglapat ng UNTV News and Rescue Team Cebu sa isang naaksidenteng motorista Osmeña Boulevard, Cebu City nitong Linggo, Setyembre 15, 2013. (UNTV News)

CEBU CITY, Philippines – Isang lalaki na biktima ng vehicular accident ang tinulungan ng UNTV News and Rescue Team sa may Sergio Osmeña Boulevard, Cebu City, Linggo.

Nagtamo ng sugat sa noo ang biktimang kinilalang si Francisco Debalujos dahil sa pagka-untog sa wind shield ng kanyang sasakyan.

Ayon sa pinsan ng biktima na si Alan Jaena, mabilis ang takbo ng sasakyang sumusunod sa kanila kaya sumalpok ito sa kanilang sasakyan habang nakahinto sa may traffic light.

“Nakahinto na kami ilang segundo na, ang ibang sasakyan na mga motor nakahinto na rin, siya mabilis pa rin ang takbo, impact talaga, kaya kami nabangga diyan.”

Agad namang nilapatan ng news and rescue team ng pangunang lunas ang biktima at agad isinugod sa Cebu City Medical Center. (Josiel Kandamkulathi / Ruth Navales, UNTV News)

Ang UNTV News and Rescue Team sa pagtulong sa isang motoristang naaksidente sa Barangay Pag-Asa, Quezon City. (UNTV News)

QUEZON CITY, Philippines – Tinulungan ng UNTV News and Rescue Team ang isang lalaking naaksidente sa Barangay Pag-Asa, Quezon City.

Sa salaysay ng biktima na si Marlon Belza, biglang dumulas ang kaniyang sinasakyang motorsiklo at nasagasaan ng isang van na nasa kaniyang likuran.

Nagtamo ng sugat sa kaliwang tuhod, gasgas sa baba at pisngi ang biktima.

Agad namang nilapatan ng lunas ng UNTV News and Rescue Team ang sugatang lalaki at dinala sa Quezon City General Hospital.

Ayon sa driver ng van, bigla na lamang sumulpot ang motorsiklo kaya niya ito nabangga. Mabuti na lamang umano at agad siyang nakapag-preno kaya hindi masyadong nasaktan ang biktima.

Nangako naman ang driver ng van na sasagutin ang gastos sa ospital ni Belza.

Muli namang nagpaalala ang MMDA sa mga motorcycle rider na doblehin ang pag-iingat lalo na tuwing umuulan para makaiwas sa disgrasya.(Mon Jocson / Ruth Navales, UNTV News)

Ang pagresponde ng UNTV News and Rescue Team sa isang naaksidenteng nagbibisikleta sa kahabaan ng Quezon Avenue alas-9 ng umaga nitong Martes. (UNTV News)

QUEZON CITY, Philippines — Nilapatan ng pangunang-lunas at agad na isinugod sa ospital ng UNTV News and Rescue Team ang isang lalaking nasugatan sa ulo matapos sumemplang sa sinasakyang bisikleta sa west bound lane ng Quezon Avenue, QC alas-9 ng umaga, Martes.

Kinilala ang lalaki na si Alfredo Galope, isang waiter.

Ayon kay Galope, papasok na sana siya sa trabaho nang sumemplang ang sinasakyang bisikleta at humampas ang kaniyang ulo sa kasabayang motorsiklo.

Nilapatan rin ng rescue team ang driver ng motorsiklo na si Gregorio Echavez, 39 anyos, isang cook, matapos magtamo ng galos sa katawan dahil sa aksidente.

Nangako naman si Echavez na sasagutin ang gastos sa pagpapaospital ni Galope. (Victor Cosare / Ruth Navales, UNTV News)

Ang tumaob na pampasaherong jeep sa Cebu City nitong Biyernes, November 01, 2013. (UNTV News)

CEBU CITY, Philippines – Nirespondehan ng UNTV News and Rescue Team ang mga pasahero ng isang jeep na tumagilid habang binabagtas ang kahabaan ng E. Soriano St., Cebu City, ala-5 ng umaga, Biyernes.

Dalawa sa mga pasahero ng jeep ang nasugatan sa aksidente.

Nagtamo ng malalim na sugat sa ulo ang pasahero na si Napoleon Belecaon, habang namaga naman ang panga ni Maria Rochelle Valiente.

Agad na nilapatan ng pangunang lunas ng grupo ang mga biktima at agad na dinala sa Vicente Sotto Memorial Medical Center.

Ayon sa driver ng jeep na kinilalang si Edito Empeso, nabali ang molye ng jeep matapos madaanan ang isang lubak na siyang dahilan ng pagtagilid nito.

Nagako naman si Empeso na sasagutin ang gastos sa pagpapagamot ng mga nasugatang pasahero. (Marlhon Abique / Ruth Navales, UNTV News)

Ang paglapat ng pangunang lunas ng UNTV News and Rescue Team-Rizal sa mga menor de edad na naaksidente nitong madaling araw ng Enero 01, 2014 sa Angono Highway. (UNTV News)

RIZAL, Philippines – Pauwi na sana sa kanilang bahay ang tatlong babaeng magkakaibigan na sakay ng motorsiklo nang mabangga ng isang rumaragasang taxi sa kahabaan ng Angono Highway sa Rizal, alas-12 ng madaling araw ng Enero 01, 2014.

Nagtamo ng sugat at bugbog sa katawan ang magkakaibigan na pawang mga menor de edad, walang drivers license at walang mga suot na helmet.

Kinilala ang tatlong biktima na sina Angel Torres, Jacky Torres at Ley De Leon.

Agad nilapatan ng pangunang lunas ang mga biktima at dinala sa Angono Provincial Hospital.

“Sa aming pagiimbestiga at paguusap sa dalawang panig, nagkasundo ang dalawa na mag-settle na lang sila sa kanilang traffic accident,” pahayag ni PO2 Ronald Juan, imbestigador.

Samantala, umabot naman sa walong vehicular accident ang naitala ng mga pulis sa buong probinsya sa pagpapalit ng taon. (Garry Perez / Ruth Navales, UNTV News)

Ang nasunog na pampasaherong bus ng Fermina Transit nitong madaling araw ng Biyernes sa kahabaan ng Commonwealth Avenue. Isa ang UNTV Fire Brigade sa mga tumulong sa pag-apula ng apoy. (UNTV News)

QUEZON CITY, Philippines — Rumesponde ang UNTV Fire Brigade at tumulong sa pagapula ng apoy sa isang pampasaherong bus na nagliyab habang bumibiyahe sa kahabaan ng Commonwealth Avenue, Quezon City nitong madaling araw ng Biyernes.

Umabot sa ika-apat na alarma ang sunog at nadamay pa sa insidente ang tatlong eatablisyimento matapos umano itong maatrasan ng bus.

Ayon sa mga nakakita sa pangyayari, biglang nagliyab ang Fermina Transit Bus na biyaheng Fairview sa gitna ng kalsada.

“More or less 20 meter from the establishment nakita nila na nag-wawild tapos umalis yung driver at conductor tapos unti-unti nang umatras sa pwesto nila Alcaraz family,” pahayag ni Fire Supt. Jesus Fernandez.

Wala namang nasaktan sa nangyaring sunog dahil agad naglabasan ang mga pasahero at ang driver ng bus.

Tumagal ng halos isang oras ang sunog bago ideneklarang fire out ng mga awtoridad. (Benedict Galazan / Ruth Navales, UNTV News)

Ang naaksidenteng motorista sa Novaliches na tinulungan ng UNTV News & Rescue Team. (UNTV News)

MANILA, Philippines — Sugatan ang isang 19 anyos na lalaki nang banggain ng isang SUV ang minamaneho nitong motorsiklo sa General Luis Ave., Novaliches, Quezon City, alas 8:45 noong Linggo.

Agad na nilapatan ng paunang UNTV News and Rescue Team ang mga tinamong gasgas sa katawan ng biktimang si Darwin Sumande at pagkatapos ay agad itong dinala sa Quezon City General Hospital.

Nagkaroon din ng malaking hiwa sa noo, kilay at ilong ang angkas nito sa motorsiklo na si John Quimpo na dinala naman ng Department Of Public Order & Safety (DPOS) sa ospital.

“Ang nangyari diyan tumatakbo sila papauwi sila ngayon may kabuntot silang adventure na puti natumbok sila pagkakatumbok sa kanila tumilapon silang dalawa iniwanan naman ng Adventure,” pahayag ng imbestigador na si Andres Gloria.

Samantala, nilapatan rin ng pang-unang lunas ng UNTV News and Rescue Team ang mga tinamong sugat at galos ng mga pasahero ng isang tricycle na sumalpok sa isa pang sasakyan sa Purok Uno, Brgy. Parian maghahating-gabi noong Linggo.

“Itong Ford Piera nakapasok sa gitna sa linya ng motor, itong motor kapag nakarekta mahirap ng lumiko,” saad ni PO2 Ulyssis Santiago, Calamba PNP Investigator.

“Pumasok siya bigla, di na kami nakapag-menor,” pahayag naman ng pasahero ng tricycle na si Mark Anthony Olaviaga.

Agad nadinala ng mga barangay tanod ang driver ng Ford Piera na walang lisensiya habang isinugod naman sa ospital ang driver ng tricycle na nagtamo ng malubhang bali sa braso.

Nagtamo naman ng sugat sa kaliwang dibdib si Junrel Ligama, 24 anyos, matapos mabaril ng di pa nakikilalang suspek sa Hoops D0me, Lapu-Lapu City, alas-8 gabi, Linggo.

Agad namang nilapatan ng paunang lunas ng UNTV News and Rescue Team ang biktima at dinala sa Vicente Sotto Mem0rial Medical Center. (Jerico Albano / Ruth Navales, UNTV News)

Ang isa sa mga biktima ng aksidente sa Mandaue City, Cebu nitong madaling araw ng Huwebes. (UNTV News)

CEBU CITY, Philippines – Dalawa ang nasugatan sa banggaan ng taxi at motorsiklo sa Mandaue City, Cebu pasado alas-3 ng madaling araw nitong Huwebes.

Kinilala ang mga sakay ng motorsiklo na sina James Carl Mata, 23 anyos, at ang angkas nito na si Romulo Alinsug, 15 anyos na nagtamo ng bukol sa ulo at galos sa iba’t ibang bahagi ng katawan.

Agad namang nilapatan ng paunang lunas ng UNTV News and Rescue Team ang mga pinsalang tinamo ng dalawa.

Ayon sa mga nakasaksi, ang motorsiklo umano ang bumangga sa taxi na agad itinanggi ng driver ng motorsiklo.

Bagama’t tumanggi nang magpadala sa pagamutan si Mata, ay isinugod naman sa pinakamalapit na ospital ang angkas ng motorsiklo na si Alinsug.(UNTV News)

Bahagi ng pagdiriwang ng Bureau of Fire Protections nitong umaga ng Lunes, Marso 02, 2014, sa Quezon City Memorial Circle. (UNTV Drone / Argie Purisma)

MANILA, Philippines – Nakibahagi ang UNTV Fire Brigade sa ika-48 pagdiriwang ng Fire Prevention Awareness Month. Nakiisa ang UNTV sa isinagawang “Walk for Fire Free” ng Bureau of Fire Protection (BFP) na ginanap  sa Quezon City Circle.

Simula pa noong Agosto 2011 ay katulong na ng BFP ang UNTV Fire Brigade sa pagapula ng mga sunog sa kalakhang Maynila.

Nito lamang nakaraang linggo ay sumailalim sa training ang buong grupo para sa forest firefighting upang mas lalong mapaigting ang kakayahan sa pagapula ng sunog.

“Naisipan nating mag training ng ganun dahil may pinoprotektahan tayong part dito sa Metro Manila na kung saan nandun ang malaking supply natin ng tubig pag nagkaroon ng sunog maaaring makontamina yung source ng water ng Metro Manila so in-offer satin yung training,” pahayag ni UNTV Fire Brigade Chief, Angelo John Dela Paz.

Ang UNTV Fire Brigade ay isa lamang sa napakaraming public service na inumpisahan ni Mr. Public Service Kuya Daniel Razon upang makatulong sa ating mga kababayan. (UNTV News)

Ang UNTV Fire Brigade na kasama sa mga volunteer fire fighting teams na dumalo sa pagtitipong ito ng Kagawaran ng Pamatay Sunog. (MON JOCSON / UNTV News)

Ang pagbisita ng Rescue 116-Cagayan sa UNTV News and Rescue Headquarters upang makakuha karagdagang kaalaman at motibasyon sa paglilingkod sa kapwa. (UNTV News)

QUEZON CITY, Philippines — Napili ng Rescue 116, isang rescue volunteer organization sa Baggao, Cagayan ang UNTV News and Rescue upang magbigay ng lecture para sa karagdagang kaalaman sa rescue operation kapag may kalamidad.

Mahigit tatlumpung miyembro ng Rescue 116 ang lumuwas ng Maynila para sa kanilang observation and study tour o lakbay aral.

Ayon kay Edgar Guillermo ng Baggao MDRRMO, isa ang UNTV News and Rescue sa napili ng Rescue 116 na puntahan upang makakuha ng mga ideya kung papaano pa nila mapapalakas ang kanilang grupo.

“Talagang pinili naming ang UNTV News and Rescue kasi sa mga bali-balita na maganda yung ginagawa ng news and rescue na sa lahat na kasuluk-sulukang bayan ay napupuntahan nila at nakakapagbigay ng tulong.”

Personal namang ipinakita ni UNTV News and Rescue Operations Manager Jeffrey Santos sa mga miyembro ng Rescue 116 ang ilan sa mga equipment na ginagamit ng news and rescue sa mga rescue operation.

Maging ang ilan sa mga skill ng news and rescue gaya ng firefighting ay ipinamalas din sa mga ito.

Ayon kay Guillermo, nagpapasalamat sila na nagkaroon ng pagkakataon na masubukan ang ilang technique sa rescue operations.

“Ito yung first time na nasubukan nila yung actual na paghawak ng hose kahit meron na kaming mga training pero ito talaga napakaganda at napakasaya,” saad ni Guillermo.

“We were able to show more we were able to isipin mo sa dalawang oras dapat nga nagtatlong oras pa tayo so it meant that they really have good time with us,” pahayag naman ni Jeffrey Santos.

Kaalinsabay nito ay nagpahayag din ang mga opisyal ng Rescue 116 ng mas pangmatagalang partnership sa ni UNTV News and Rescue pagdating sa rescue operation.

Bukas naman ang pamunuan ng news and rescue sa naturang panukala

Ayon kay Jeffrey, “UNTV is does not mean business we mean public service and that came from Mr. Public Service Kuya Daniel Razon.” (Benedict Galazan / Ruth Navales, UNTV News)

Ang paglilipat ng UNTV News and Rescue Team sa spine board sa naaksidenteng pulis. (UNTV News)

MANILA, Philippines – Nirespondehan ng UNTV News and Rescue Team ang banggaan ng motorsiklo at taxi sa United Nations Avenue corner San Marcelino Street sa Maynila, ala-1 ng madaling araw, Lunes.

Agad nilapatan ng paunang lunas ng news and rescue ang driver ng motorsiklo na kinilalang si PO1 Jesy Javarez, 28 anyos na nagtamo ng malubhang pinsala sa ulo.

Matapos bigyan ng first aid ay dinala na ng grupo sa Philippine General Hospital (PGH) si Javarez.

Naaksidente si Javarez matapos umanong mabangga ng isang taxi na minamaneho ni Cesar San Miguel na ngayo’y hawak na ng Manila Police District Traffic Bureau para sa kaukulang imbestigasyon.

Magkahiwalay na aksidente sa Bacolod City, nirespondehan ng UNTV News and Rescue Team

Nilapatan rin ng paunang lunas ng UNTV News and Rescue Team ang motorcycle rider na si Brian Taasan, 35 anyos, matapos mabangga ng pickup truck sa Bacolod City, pasado alas-11ng gabi noong Biyernes.

Nagtamo ang biktima ng sugat sa tuhod at pang bahagi ng katawan.

Matapos malapatan ng paunang lunas ay agad itong dinala sa Bacolod Adventist Medical Center.

Ayon kay Taasan, binabagtas nito ang kahabaan ng Mansilingan Road at hindi na niya naiwasan ang lumilikong pickup truck.

Inamin rin ni Taasan na mabilis ang takbo ng kanyang motorsiklo kaya’t hindi rin niya masisi ang driver ng pickup truck.

Samantala, isa pang vehicular accident ang nirespondehan ng UNTV News and Rescue Team maga-alas-2 ng madaling araw noong Sabado.

Sugatan ang pedicab driver na si Randy Belenario, 37 anyos matapos mabundol ng isang pickup truck sa kahabaan ng Lacson Street sa Bacolod City.

Agad na nilinis at nilapatan ng first aid ang tinamong sugat ng biktima.

Matapos malapatan ng paunang lunas ay agad dinala ang biktima sa Corazon Locsin Memorial Regional Hospital. (UNTV News)

Ang paglapat ng bandage sa biktimang kinalang si Joel Villa Lobos na tumilapon sa sinasakyang motorsiklo nang mabangga ng isa pang motorsiklo. (UNTV News)

LAGUNA, Philippines — Nirespondehan ng UNTV Laguna News and Rescue Team ang sugatang driver ng isang motorsiklo sa Parian, Laguna, alas-4 ng hapon, Lunes.

Agad nilapatan ng paunang lunas ng grupo ang namagang tuhod ni Joel Villa Lobos matapos tumilapon sa sinasakyang motorsiklo nang mabangga ng isa pang motorsiklo.

Ayon kay Villa Lobos, binabagtas niya ang kahabaan ng national road ng Brgy Parian nang bigla umanong sumulpot sa kanyang harapan ang isa pang motorsiklo na minamaneho ni Mike Singgon.

At dahil mabilis ang kanyang takbo ay hindi na niya ito naiwasan.

“Hindi ko naman pwedeng biglaing itigil yung motor at ako naman ang magpapakamatay sisisid naman ako.

Dagdag pa nito, “Nakatago sila sa bus bigla silang lumabas, nakapagmenor ako pero huli na kase kung malakas ang takbo ko talsik kame pare parehas eh ako nga ang tumalsik hindi sila.”

Ayon naman kay Singgon, “Sige sige pa rin siya hindi siya nagpreno ayan inabot yung motor ko sa unahan bumaliktad kame ng asawa ko tapos nangangatwiran pa siya ang tama.”

Bagama’t nagkaroon ng pagtatalo, sa huli ay nagkasundo rin ang dalawang driver at napagpasyahang ipapagawa na lang ang motorsiklo ni Singgon.

Tumanggi namang magpadala pa sa ospital si Villa Lobos. (Sherwin Culubong / Ruth Navales, UNTV News)